von Zum Sokrates kummt e Rätscher g’rennt –
mer kennt jo määne, dass wu brennt –
so eilig scheint die Sach zu sei:
„Horch, Sokrates, ich sag der glei,
was ich do gheert häb uff de Strooß –
ich will der’s saache – mään jo bloß –
das werd dich sicher intressiere –
ich steer dich zwar grad beim Studiere,
doch das musch wisse – un sofort…!“
De Philosoph fällt em ins Wort:
„Moment, mei Liewer, mach e Paus –
un ruh die Zung e bissel aus!
Ich mach e Vorschlag fer dei Red –
die helft uns all – e jedi Wett!
Fer Neiigkääte hör mei Bitt:
Was du so dringend saache witt –
do nämm drei Sieb – un geb gut acht –
was mer do immer glei mit macht:
Mei erstes Sieb froocht – spitz dei Ohr: –
Isch das, was d’sage witt, äch wohr?! –
De Rätscher – e Moment versteert:
„Ich wääß nit, häb’s nit selwer g’heert!
E annere hot’s mer verzeehlt –
ob’s wohr isch?“ – Oh, das kummt gequält!
De Sokrates losst em kä Ruh:
„Jetzt kummt noch s’zwääte Sieb dezu:
„Isch das, was D’sage witt, ääch gut?“ –
Beim Rätscher bröckelt schun de Mut:
„S’isch äch nit gut, was ich do wääß“ –
Nit wohr? Nit gut? – Do wird’s em hääß –
do lääft er aa, werd rot im G’sicht –
do schämt er sich, de Tratsch-Klatsch-Wicht.
Er war so stolz – un denkt debei:
Wär’s dritte Sieb doch schun vorbei!“
De Philosoph legt’s uff de Tisch:
„Ob, dass mer’s saagsch äch nötig isch?
Muss ich des wisse? Tut mer’s nütze?“ –
Drei Sieb duun uns vorm Klatsche schütze!
De Rätscher schleicht sich kleinlaut fort! –
De Sokrates hot’s letzte Wort:
Ja, Klatsch ist schlimm, weil: Klatsch isch Quatsch –
do wühlt e Wildsau sich im Matsch –
Do fehlt de Aastand, fehlt die Lieb‘. –
Drum schenkt de Sokrates drei Sieb!
Un die Moral vun dere G`schicht:
Im Rätsche-Matsch versausch dei Gsicht
